श्री संस्थेद्वारे गजानन महाराजांचे ‘श्री’च्या प्रकटदिनोत्सव, श्रीराम जन्मोत्सव तसेच ‘श्री’च्या पुण्यतिथी उत्सव (ऋषिपंचमी) हे तीन उत्सव मोठ्या प्रमाणात साजरे केले जातात. या उत्सवात सहभागी होण्यासाठी संपूर्ण महाराष्ट्रातून हजारो वारकरी आपापल्या दिंडी घेऊन येतात. श्रींच्या वारी व वारकऱ्यांची आवश्यक त्या प्राथमिक सुविधांची सुंदर अशी व्यवस्था करण्यात येते.
निवास व्यवस्था :
वारकऱ्यांच्या संख्येनुसार विसावा, विहार परिसरामध्ये श्री संस्थेद्वारे सेवाभावपूर्वक आवश्यक त्या सर्व प्राथमिक सुविधांची व्यवस्था करण्यात येते. श्री कृपेने येथे येणाऱ्या वारकऱ्यांकरिता महाप्रसाद, प्रथमोपचार, पिण्याचे शुद्ध पाणी, स्नानगृह व सेवा अखंडपणे उपलब्ध करून दिल्या जातात.
‘श्री’च्या पुण्यतिथी उत्सवामध्ये (पावसाळा असल्याने) साहित्य वितरण व अंशदान प्रक्रियेसाठी मजबूत असा वॉटरप्रूफ मंडप उभारण्यात येतो. प्रत्येक उत्सवामध्ये उपस्थित वारकऱ्यांची संख्या मागील वर्षीपेक्षा २५ ते ३० टक्के वाढीव असल्याने, वारकऱ्यांना त्या वाढी प्रमाणात निवास तसेच इतर सुविधांची व्यवस्था करणे गरजेचे आहे. वारकरी संस्थेच्या आकडेवारीनुसार मंडप देण्यात येतात. मंडपामध्ये येण्या-जाण्याकरिता प्रशस्त मार्ग आखण्यात येतो. प्रत्येक मंडपामध्ये साफसफाईकरिता एक सेवाधारी तसेच त्यांचे देखरेखकरिता एक देखरेख सेवक असतो. वारकऱ्यांना येणाजाण्याच्या माहिती देणारी याकरिता मंडपाच्या बाहेरील बाजूस सर्व रस्त्यावर मंडप क्रमांक व गेट क्रमांकाचे बोर्ड लावण्यात येतात. वारकऱ्यांना सूचना व माहिती देण्याकरिता स्पीकरची व्यवस्था करण्यात येते. ट्यूबलाइट (बल्ब आदींसह) यांची बाहेरील रस्ते व अन्य ठिकाणी व्यवस्था देखील करण्यात येते. सुरक्षा आणि सुव्यवस्थेच्या दृष्टीकोनातून श्री संस्थेच्या अग्निशमन वाहनांची व्यवस्था तसेच अॅम्ब्युलन्स २४ तास उपलब्ध असते.
काही दिंड्या स्वतःच्या व्यवस्थेत येतात त्यांना त्यांच्या आवश्यकतेनुसार शिधा वितरण केले जाते. स्वयंंपाक करण्याकरिता विटा व लाकडे पुरविण्यात येतात. दिंड्यासोबत पाणी टँकर व स्वतःचा मंडप असल्यास त्यांना श्री संस्थेकडून सहयोग निधी देण्यात येतो तसेच परिसरामध्ये लाईट व्यवस्था, आखणी आणि वाहन ठेवण्यासाठी जागा उपलब्ध करून देण्यात येते.
श्री महाप्रसाद व्यवस्था :
श्री उत्सवामध्ये सहभागी होणाऱ्या सर्व वारकरी दिंड्यांची भोजन व्यवस्था अहोरात्र (२४ तास) सुरू असते. वारकरी कोणत्याही वेळेस भोजन घेऊ शकतात अशी भोजनव्यवस्था ठेवण्यात येते. महाप्रसादबारी, प्रसाद वितरण आणि भोजन मंडपामध्ये ही व्यवस्था करण्यात येते. साफसफाईकरिता सेवाधारी यांच्या नियोजन करण्यात येते. महाप्रसाद वितरणाचे वेळी एका रांगेत दहा रांगा चालतील अशी व्यवस्था केली जाते. परिसराच्या ठिकाणी उत्तम प्रकाश व्यवस्था असते.
श्री महाप्रसाद तयारी (किचन हॉल) :
श्री उत्सवामध्ये वारकऱ्यांकरिता लागणारा महाप्रसाद श्री संस्थेच्या सेंट्रल किचनमध्ये (अन्नपूर्णा अक्षयपात्र पाकशाळा) तयार होऊन श्री संस्थेच्या वाहनातून पॅकबंद स्वरूपात उत्सवस्थळी पोहोचवला जातो.
सर्वसाधारणतः उत्सवाकरिता आलेल्या दिंड्यामधील वारकरी ग्रामीण भागातून येतात. त्यांना सर्व गोष्टींची नीट माहिती व्हावी यासाठी चौकशी कक्ष व्यवस्था केली जाते. वारकऱ्यांच्या शंका, समस्या जाणून घेण्याकरिता अनुभवी सेवाधाऱ्यांची नियुक्ती करण्यात येते.
‘श्री’च्या उत्सवामध्ये आलेल्या वारकऱ्यांच्या आरोग्याची काळजी घेताना श्री संस्थेच्यावतीने विहार आणि विसावा परिसरामध्ये रांत्रंदिवस प्रथमोपचार केंद्राची व्यवस्था करण्यात येते. मंडपामध्ये पार्टिशन लावून टेबल, खुर्च्या, कुलर, रुग्णांकरिता कॉट, सलाईन स्टँड, पंखे, पिण्याचे पाणी यांद्वारे दवाखान्याची तसेच प्रतीक्षालयाचीही व्यवस्था करण्यात येते. दोन्ही परिसरात डॉक्टर्स, इंजेक्टर, कम्पाऊंडर, ड्रेसर, रुग्ण तपासणी, औषध वितरण हे विभाग तसेच त्यावर देखरेखीसाठी सेवाधारी सेवकांची नेमणूक करण्यात येते. प्रथमोपचार केंद्रानजिकच २४ तास सज्ज अँम्बुलन्स वारकऱ्यांच्या आरोग्यसेवेत सतत तत्पर राहते.
स्नानगृह व्यवस्था :
‘श्री’च्या उत्सवामध्ये येणाऱ्या वारकऱ्यांच्या स्नान व्यवस्थेकरिता विहार आणि विसावा परिसरामध्ये १००० नळ-तोंट्यांची क्षमता असलेले भव्य स्नानगृह तयार करण्यात आले आहे.
पार्किंग व्यवस्था :
उत्सवामध्ये तसेच यात्रांमध्ये दूरच्या अंतरावरून आलेले बहुसंख्य वारकरी त्यांच्या वाहनाने येतात तेव्हा श्रीसंस्थेकडून त्यांची वाहने व्यवस्थित ठेवण्याकरिता पार्किंग व्यवस्था करण्यात येते.
‘श्री’च्या उत्सवामध्ये मोठ्या संख्येने येणाऱ्या वारकऱ्यांसाठी ठिकठिकाणी पिण्याच्या पाण्याची (आर.ओ.) २४ तास व्यवस्था करण्यात येते. दिंडी नोंदणी, पार्किंग परिसर, प्रसादालय, दवाखाना, अंशदान मंडप व मंडपांच्या संख्येनुसार प्रत्येक मंडपाजवळ निर्जंतुकीकरण केलेल्या पिण्याच्या पाण्याची व्यवस्था करण्यात येते.
वारकरी भक्तांच्या सोयीकरिता परिसराच्या जवळ महिला व पुरुषांसाठी वेगवेगळ्या प्रसाधनगृहांची व्यवस्था करण्यात येते. येथे आरोग्यविषयक सोयीसुविधांकडेही विशेष लक्ष पुरविण्यात येते.
निवास परिसरात विद्युत विभागाकडून लाईट, फोकस, स्पीकर्स लावण्यात येतात. लाईन गेल्यास अतिरिक्त जनरेटरची व्यवस्थाही केलेली असते. ही सर्व व्यवस्था करीत असताना काही अपघात होऊ नये याचीही विशेष दक्षता घेतली जाते. विद्युत व्यवस्थेवर देखरेख करण्याकरिता स्वतंत्र देखरेख सेवकाची नियुक्ती करण्यात येते.
उत्सवामध्ये येणाऱ्या वारकऱ्यांना उत्सवाच्या दिवशी कीर्तन श्रवणाचा लाभ व्हावा या दृष्टिकोनातून विसावा किंवा विहार यापैकी एका परिसरामध्ये कीर्तनाची व्यवस्था करण्यात येते. कीर्तनाकरिता नैतिक शिक्षण विभागामार्फत निमंत्रीत कीर्तनकार महाराजांचे कीर्तन ठेवण्यात येते. कीर्तनाची व्यवस्था वारकरी भोजन मंडपामध्ये करण्यात येते. कीर्तनाची वेळ रात्री ९ ते ११ वाजेपर्यंत ठेवण्यात येते.
